Tomas Tranströmer

Oorgangsplek

Tomas Tranströmer

Yswind in my oë en sonne dans

in die kaleidoskoop van trane as ek

die straat oorsteek wat my so lank gevolg het,

die straat waar Groenlandsomers glinster in die poeletjies.

Om my die swermende straat se volle krag

wat niks onthou nie en niks wil hê nie.

Diep onder die aarde onder die verkeer

wag die ongebore woud stilweg duisend jaar al.

Ek kry die idee dat die straat my sien.

Die kyk is so dof dat die son self

‘n grys bal is in ‘n swart ruimte.

Maar nou skyn ek! Die straat sien my.

Uit Sweeds vertaal deur De Waal Venter

Övergångstället

Tomas Tranströmer

 Uit: Sanningsbariären 1978